речиси (прил.) - цел (прид.)

Страхуваше во позаостанатите делови на Балканот, а Балканот речиси целиот беше таков, пресметките со свештениците да не бидат пожестоки, подолготрајни, со повеќе последици.
„Времето на козите“ од Луан Старова (1993)
Речиси цела ноќ слушаше домашни и странски радиостаници, западни и источни.
„Времето на козите“ од Луан Старова (1993)
Јас не сум таа шовинистичка свиња и во тоа е речиси целата моја оригиналност.
„МАРГИНА бр. 35“ (1997)
Моите сопатници го окупираа со багажот речиси целото купе. Немаме во него никој друг освен нас.
„Патувања“ од Никола Кирков (1982)
Ја избришав речиси целата копија и ја забележав нашата порака во празнините оставајќи доволно од програмот за да може да биде идентифициран.
„МАРГИНА бр. 19-20“ (1995)
Но зашто и тие, и војниците сместени најгоре на Чауле не можеа да се одбранат од ајдутите, во 1873-та, кога беа изградени општината и училиштето, се симнаа во Потковицата и горниот кат од општината, речиси целата општина, ја претворија во ујќумат.
„Потковица на смртта и надежта“ од Миле Неделкоски (1986)
Тука мораше да биде и Мајка. Речиси целото семејство. Само Татко го немаше.
„Атеистички музеј“ од Луан Старова (1997)
Речиси цела визба ја преоравме. остануваше уште оној дел покриен со дрва.
„Улица“ од Славко Јаневски (1951)
Паралелно со полнењето на затворите во речиси цела Македонија и применувањето на познатите и испитани тортури против целото македонско население (специјални експедиции против македонски села, палежи, грабежи и слично), во Солун се подготвувало судење кое, според замислата на официјален Цариград, правосудството на султанот требало да го претстави пред Европа во една за неа непозната светлина.
„Солунските атентати 1903“ од Крсте Битоски (2003)
Пишувајќи за навистина тешката економска и психичка ситуација во која се нашло речиси целото христијанско население во Битола, М. Ристиќ ги изнесува и следниве интересни сознанија до кои дошол: „Христијанското население живее постојано во некакво очекување дека нешто ќе се случи што еднаш ќе тури крај на оваа неподнослива ситуација.
„Солунските атентати 1903“ од Крсте Битоски (2003)
Додека масовни убиства биле одбегнати, дотогаш апсењето и малтретирањето на егзархискиот дел од нашиот народ во речиси цела Македонија зело невидени размери.
„Солунските атентати 1903“ од Крсте Битоски (2003)
Пишувам уште една приказна, или писмо, за љубовта. За мене, набрекнато кубе на Даут-пашиниот амам го преполнува речиси целиот прозорец.
„Слово за змијата“ од Александар Прокопиев (1992)
- Ајде, деца, ве очекувам речиси цел ден.
„Последната алка“ од Стојан Арсиќ (2013)
Тој ситен дождец, речиси целиот ден, беше нивен следбеник.
„Последната алка“ од Стојан Арсиќ (2013)
Речиси целата група стоеше на работ од провалијата. Но, Ивона сѐ уште молеше за помош.
„Последната алка“ од Стојан Арсиќ (2013)
Ме честеше мене и речиси цела кафеана со шампањско.
„Последната алка“ од Стојан Арсиќ (2013)
Ореовата крошна го прекриваше речиси целиот двор.
„Последната алка“ од Стојан Арсиќ (2013)
Едно време преброја во своите ноѕе уште шест преостанати трупци од сета онаа грмада, што беше наредена тука, зафаќајќи ја речиси целата половина од оваа голема просторија.
„Белата долина“ од Симон Дракул (1962)
Ема беше потпрена на бирото со двете раце; речиси целата тежина од горниот дел на телото ѝ паѓаше на дланките.
„Полицајка в кревет“ од Веле Смилевски (2012)
Без никаков воведен збор, дури и без да го поздрави, Марија го замоли да ѝ даде цигара. Ѝ даде една, ѝ ја запали, и ѝ ја подари речиси целата кутија.
„Црни овци“ од Катица Ќулавкова (2012)
Додека ја слушаше, докторот со прстите ѝ ја милуваше косата, ѝ ја местеше перницата за да може подобро да дише, ја водеше низ лавиринтот на нејзината несигурност со мудрост и нежност за какви што никогаш не ни сонувала.
„Црни овци“ од Катица Ќулавкова (2012)
Ќе заминат да живеат во селото Даир ал Асад. Станува бегалец и во родната земја.
„Амбасади“ од Луан Старова (2009)
Речиси целиот живот ќе му мине во потрага по патот кој води во родната земја, остварувајќи го вистинското враќање само во јазикот!
„Амбасади“ од Луан Старова (2009)
Во пуста печалба беше замината речиси целата класно – географска структура на нацијата: здрави селски момци кои што во енклавата викана запад ги работеа најцрните работи, поосвестени луѓе кои не сакаа децата да им растат во земја која ја водат Тодоровци и Стојановци, а побогатите семејства кои го сметаа Стојан за неизделкан простак, ги испраќаа децата да студираат во странство, со тенеденција да останат таму да живеат.
„Браќата на Александар“ од Константин Петровски (2013)
Само еднаш по речиси цел месец вечерни средби тие успеаја да разменат бакнеж.
„1984“ од Џорџ Орвел (1998)
Речиси целата преостаната ноќ ја мина со овие мисли, помеѓу сонот и јавето... ***
„Ервехе“ од Луан Старова (2006)
Учеството на Мајка во балканската историја беше директно, посебно низ историјата на нејзините страдања во спасувањето на децата, на семејството, во времето на војните и на преселбите, додека Татко речиси целиот живот ја пишуваше својата незавршена Историја на Балканот низ падовите на империите.
„Ервехе“ од Луан Старова (2006)
Од прозорчето можеше да се опфати речиси целата просторија; дури и подиумот на кој беа сместени музичарите со излаштени инструменти.
„Желките од рајската градина“ од Србо Ивановски (2010)
Татко му на Зоки Поки не е многу дома, но кога е, тој речиси целото време му го посветува нему.
„Зоки Поки“ од Оливера Николова (1963)
Дали поради заминувањето на Пела на училиште или поради поставеното барање поинаку да се облекува, таа речиси цела ноќ водеше разговор самата со себе.
„Црна билка“ од Ташко Георгиевски (2006)
Речиси цел месец е така.
„Небеска Тимјановна“ од Петре М. Андреевски (1988)
Не се гледаше низ тревата, но нозете им шлапкаа и им пропаѓаше речиси целата стапалка.
„Бегалци“ од Јован Бошковски (1949)
Стомачето седеше на столот речиси цела вечер, а јас играв.
„Знаеш ли да љубиш“ од Ивана Иванова Канго (2013)